Academia Gascona de Baiona-Ador
HONHAR QUE CAU !
Pèire BEDAT
Arrevirat en Bearnés-Gascon-Occitan, « La Honhada », imne de la Seccion Paulina escrivut per lo Didièr Fois, que vad açò :
1
Honha Seccion, qu'èm aquí,
Aquera canta sonque tà tu !
Com immortaus, au ton costat,
Tostemps fidèus en amistat.
Arrepic
Hètz-v'i, hètz-v'i, los verds e blancs
De la ciutat deu Verd Galant,
Seccion Paulina, jòga ton rugbi,
Seccion Paulina, tostemps units !
2
Suu ton malhòt verd e blanc,
Lo Pic d'Aussau tostemps davant,
Sus aquesta tèrra deus pirenèus
L'anar fièr deus Béarnés.
3
Ací que cantan « Béth cèu deu Pau »,
Que plavi e que venti, e qu'ei atau.
Tostemps amassa que cantaram,
Tostemps amassa que ganharam
Darrèr arrepic
Hètz-f'i, hètz-v'i, los verds e blancs
De la ciutat deu Verd Galant,
Seccion Paulina, jòga ton rugbi,
Seccion Paulina, amassa ací !
Estimulats peus suportaires, los jogadors de la Seccion Paulina que jògan los purmèrs ròtles en campionat de pro D2, en tot esperar har mélher. Arretrobar lo boclèr de Brennus, après las victòrias de 1928, 1946 e 1964, i pòden enqüèra saunejar ? Qui ac sap ?
La dusau vila deu departament, a las termièras de la Gasconha e deu Bascoat, qu'a tanben avut las soas òras de glòria au reiaume d'Ovalia. L'Aviron Baionés tanben qu'a ganhat tres còps lo famós boclèr de Brennus, en 1913, 1934 e 1943 … en jogant « a la baionésa », donc en tot utilizar la tiénça deus sons tres quarts. Mes totun, avant, n'a pas oblidat .. de honhar. En efèit, a la debuta deu sègle vintau, pèças de teatre, o meilèu revistas teatraus locaus, que son estadas jogadas sus l'empont baionés. Que i a avut, en 1907, « Pòt anar ! », en 1911 « Mesclanha ! », en 1913 « Honhar ! Honhar ! »
D'autas que seguiràn, dab sovent títols en Gascon. Que cau díser que la lenga nòsta èra hòrt presenta en aqueth temps, hèra mei que l'euskara. E las pèças de teatre que mesclavan sovent Gascon e Francés. Cantas dab paraulas navèras qu'èran interpretadas peus actors amators qui's trufavan de personatges coneishuts de la vila.
Den saquera revista « Honhar ! Honhar ! », lo Cyprien LABOUDIQUE que conta ua partida de rugbi jogada per lo « Pignes Ruchby Club d'Ondres » e lo « Sportinge Résine de Tarnos ». E que canta, sus l'aire de « A la façon de Barbari » aqueths tres coplets on n'èi pas cambiat un mòt, puishqu'es escrivut en … franco-gascon :
1
Dans les Landes, quand nous jouons
Au fobal, dans la hagne,
Il faut voir tous nos beaux garçons,
Nos piliers de meusclagne,
Qui gulent tous : « Hougna ! Hougna ! »
Cop de pé per ci, cap de pé par là !
Nous n'acceptons pas les demis,
C'est fini !
Les entiers sont les seuls admis,
Mon ami !
2
De suite après le coup d'envoi
Nous marquons un drogolle,
Mais l'autre jour, un maladroit,
Il s'est cassé la golle.
Tout en gulant : « Hougna ! Hougna ! »
Cop de pé per ci, cap de pé par là !
Il a foutu sur la prairie
Si jolie,
Un sibresaout dessus l'esqui,
Mon ami !
3
Le capitaine des joueurs
Est adroit comme un singe,
Il sautille, c'est un bonheur.
Quand il fait le driblinge,
Les autres gulent : « Hougna ! Hougna ! »
Cop de pé per ci, cap de pé par là !
Et tous nos buts sont réussis,
Mon ami,
Nous avons gagné la partie,
C'est fini !
L'escrivan Jean Giraudoux, occitan deu Lemosin, qu'ac avè dit en son temps : « Ua equipa de rugbi preved quinze jogadors : ueit gualhards e actius, dus leugèrs e rusats, quate grans e rapides, e un darrèr, modèle de flegma e de sangfred. Qu'es la proporcion ideau ideau entre los òmis ».
Adara, n'es pas mei lo cas. Ua equipa, que son vint-e-tres jogadors a l'encòp gualhards e actius, grans e rapides. Adara, tots que honhan. D'autes còps, que n'i avè qui mudavan los pianòs, d'autes qui jogavan la particion, ua beròjan particion on los tres-quarts acabavan lo tribalh en tot mercar de bèths ensais après de bèras corrudas.
Lavetz, honhar que cau tostemps … mes pas sonque aquò. Que cau har víver la veishiga e non pas l'aclapar devath quintaus d'òmis apielats. E donc, entà estar campion, que cau honhar … mes tanben jogar. E que tots i prenin plaser, jogadors e espectators.
Pèir RECTORAN ( 1880-1952 )
Premier secrétaire perpétuel de
l'Académie Gasconne de 1926
Carlito OYARZUN