Retour au menu Capitol de primtemps

QUI SE SOVIENERÀ ?

Ginette DUTERTRE

Qui se sovienerà de las ancianas bòrdas

Aus doç noms musicaus per cantar lo país :

E Sospaça, e Liburti, Cornau e Lasboirias ?

Qui se sovienerà de las ancianas bòrdas ?

Qui se sovienerà de las vielhas carrèras

Plenhas de calhaus e d’arrodadas de bròç,

La carrèra de Lurc, de Lanas, e de Mahòs ?

Qui se sovienerà de las vielhas carrèras ?

Qui se sovienerà qu’ací i avè camps

De vinha e de patata, e prats, e bèth indon,

La pèça deumitan, lo camp de Clavèras e Petiton ?

Qui se sovienerà qu’ací i avè camps ?

Qui se sovienerà deu teit de teulas grisas

On s’botavan a l’apric çò qu’apravan “foyer”

Dab lo hum qui s’escapava per la chaminela ?

Qui se sovienerà deu teit de teulas grisas ?

Qui se sovienerà de las petitas lanas,

De pinhas, de gemèlas, de basta e de herpin,

De la cigalha pauruca cantant au bèc d’un pin ?

Qui se sovienerà de las petitas lanas ?

Qui se sovienerà de tots los vielhs quartièrs

Qui èran petits vilatges on s’aidava la gent,

E Iriu, e Sòrsoba, las Bartas e Vidauguen ?

Qui se sovienerà de tots los vielhs quartièrs ?

La nòsta carta nativa, que nse l’am perimada,

La nòsta lenga gascona, hitiva, que se n’es anada,

E si, dab quauques mòts, ne l’am pas oblidada,

La nòsta carta nativa, que nse l’am perimada.

Hens lo Sent-Martin Vila, totas lutz alucadas

Quan las mila veituras, la nueit e’s s’ràn caradas,

La clòcha de la glèisa que va tistemps sonar,

E lo vent de la mar se’n vinerà bohar…

Mes qui se sovienerà ?

Retour au menu Capitol de primtemps