Pour revenir au sommaire du capitol, cliquer ici

LA HUELHA MORTA

Pèire BEDAT

Qu'èi vist ua huelha mòrta emportada preu vent de la mar.

Que voletejava en l'aire e a còps que's pausava a tèrra

Puish dab ua auta bohada que s'envolava mei luenh

E que partiva dab balanç cap a l'èst, mes dinc a on ?

Qu'èi vist ua huelha mòrta portada preu briu de l'arriu,

Portada per l'aiga qui s'escorrèva cap a la mar,

Mes n'i èra pas enqüèra, la praubina,

E que n'i avè, ponts e barratges a passar !

E s'èra la medisha, aquera huelha mòrta ?

Portada cap a l'èst preu vent de la mar,

Portada cap a l'oèst per l'aiga de l'arriu

Entà fin finau arrejúnher aquera mar …

S'arriba ad aquera destinacion,

Com s'acabarà lo son viatge ?

Com s'acabarà la soa vita ?

Esbrigalhada per las andadas furiosas ?

Regetada suu sable de la plaja ?

Lavetz, dab l'ajuda deu vent de la mar

Que passaré lhèu per dessús la duna

E començaré un darrèr viatge sus tèrra.

Perqué pas ?

Pour revenir au sommaire du capitol, cliquer ici